ايه هى الكوكيز؟ وايه هيا فايدته ؟ cookies

ايه هى الكوكيز؟
​

في اللغة الانجليزية، الكوكيز cookies هى نوع من انواع البسكويت. اما في لغة الكمبيوتر، فالمعنى مختلف تماما.
الكوكيز في الكمبيوتر هى عبارة عن ملفات صغيرة بتحتوي على بعض المعلومات والداتا. لما بتيجي تدخل على موقع معين، الموقع دا بيرسل الكوكيز دي لجهازك. الكمبيوتر بيخزن الكوكيز في المتصفح اللي انت بتستخدمه.
اهمية الكوكيز دي بتتمثل في انها بتساعد الموقع في انه يتابع نشاطك وعدد زياراتك له. ودي مش دايما حاجة وحشة. على سبيل المثال، كتير من مواقع البيع والشرا اونلاين بتستخدم الكوكيز عشان تحفظ انت حطيت ايه في عربة التسوق بتاعك shopping cart ومن غير الكوكيز دي، كل ما تعمل ريفرش او تدوس على لينك تاني في الموقع، الحاجات اللي حطتها في العربة دي بتختفي ودا هيخلق تجربة تسوق وحشة جدا. (في بعص الحالات، لو انت عامل لوج ان وعامل حساب على الموقع الحاجات بتفضل في عربة التسوق الخاصة بحسابك حتى لو الكوكيز اتمسحت)
الكوكيز برضو بتساعد الموقع في معرفة اذا كنت سجلت دخولك فيه او لا علشان الناس اللي مابتحبش تعمل لوج إن كل ما تيجي تدخل على موقع بتزوره باستمرار. من غيرها، كل ما تمشي من موقع انت كنت مسجل دخولك فيه هيتم تسجيل خروجك اول ما تمشي وتضطر تكتب بياناتك من جديد لما تزوره من جديد.
هل الكوكيز خطر؟ نظريا وفي الظروف الطبيعية لأ لان الكوكيز لا يمكن تغيير معلوماتها او بياناتها اثناء ارسالها من الموقع لجهازك. الكوكيز معندهاش الامكانية انها تأثر في طريقة عمل جهازك.
اما عملياً، الناس المؤذية كتير وفي بعض البرمجيات الخبيثة بتتنكر في شكل كوكيز وبيكون لها اشكال كتيرة زي supercookies ودي المتصفحات بتحاول بقدر الامكان تمنعها تلقائيا و في zombie cookies ودي نوع من انواع البرمجيات الخبيثة اللي بتخلق نفسها بعد ما يتم مسحها فتبدأ تفقد السيطرة عليها حبة في حبة. كوكيز التتبع برضو خطر لانها بتتيح لجهات كتيرة معرفة نشاطك اونلاين حتى لو انت مش بتستخدم خدمة من خدمات الجهات دي. (زي ما فيسبوك كدا بيتتبع نشاطاك خارج فيسبوك)
متدخلش على موقع انت متعرفوش. متستخدمش موقع غير مؤمن بعلامة القفل (بروتوكل https) حتى لو مش هتعمل عملية شراء فيه.
امسح الكوكيز من فترة لفترة في المتصفح الخاص بك. في جوجل كروم مثلا، تقدر تعمل كدا بانك تخش على الإعدادات settings بعدها الإعدادات المتقدمة Advanced بعدها clear browsing data