لو باقة الأنترنت المنزلي مش بتكمل معاك الشهر .. أليك الحل ..

لو باقة الأنترنت المنزلي مش بتكمل معاك شهر وبتقعد 12 يوم مثلاً مع أن أستخدامك عادي تعمل أيه ؟
ركز معايا عزيزي القارئ.
هقولك على حل موجود من فترة وأنا جربته وحسيت بفرق.
الباقة من ساعة التحديث الجديد إللي خلي السعة 140 جيجا بدل 100 جيجا، ولما السعة التحميلية دي بتخلص كان زمان أيام ال 100 جيجا كانت السرعة ( على ما أتذكر ) بتنزل ل 1 ميجا بت ودي سرعة مقبولة وكنت تقدر تعمل وتحمل كل حاجة نفسك فيها، ده أنا كان بيزيد عندي جيجات كتير من كترها كنت بفضل أحمل أفلام بجودات محترمة، لكن دلوقتي يا حبيبي لما ال 140 جيجا يخلصوا سرعتك بتنزل ل ( 256 كيلو بت ) يا أنساااااااان، ودي سرعة السحلفة أسرع منها بالتالي حضرتك بتضطر تجدد الباقة مرتين فى الشهر على الأقل لإن سرعة 256 كيلو بت دي كإن مفيش نت أصلاً عندك وطبعاً كلنا عارفيين إن ده مش أستهلاكك الحقيقي وإن الشركات بتسرقك عيني عينك.

المهم أيه الحل ؟
الحل أنك تعرف أسم الراوتر ( مكتوب فى ظهره ) وبعدها تدخل على أعدادات الراوتر بتاعك على لينك الدخول المكتوب فى ظهر الراوتر بيكون شكله زي كده : https://192.168.1.1
ب أسم المستخدم وكلمة السر ودول برضه فى ظهر الراوتر.
وتعمل تخفيض لسرعة الواي فاي وكمان تخفيض فى سرعة الأنترنت المتوصل للكمبيوتر أو اللاب بتاعك عن طريق الكابل.
طبعاً كل راوتر ليه طريقة.

لذلك أكتب فى اليوتيوب طريقة تخفيض السرعة لراوتر ( تكتب أسمه - الموديل ) مثلاً راوتر WE موديل HG531 V1
أمشي وراء الفيديو وبعدها هتحس بفرق.

ملحوظة 1 : أنا مش ساحر يعني لو سيادتك بتحب تحمل وتتفرج على الزفت التيك توك ولعبة بابجي واليوتيوب بشراهة أحساسك بالفرق هيكون بسيط وساعتها حلك أنك للأسف تعلي السعة ( الجيجات )
ولازم بالإضافة لموضوع تخفيض السرعة من الراوتر لازم تعمل حاجات تانية زي تلغي التحديث التلقائي للتطبيقات، وتشغيل الفيديو التلقائي على الفيس و اليوتيوب والتيك توك وأي تطبيقات مشابهة، وكمان تخفض الجودة حتي ل 144، لو لزم الأمر، وتلغي تحميل الوسائط زي الصور والفويس والفيديوهات على الواتس والتليجرام لو حد بعتلك مسدج.
وطبعاً تنبه على إللى فى البيت يعملوا نفس الكلام.
ساعتها صدقني هتحس بفرق كبير جداً ومن غير ما تعلي السرعة أو تجدد الأشتراك مرتين فى الشهر.
ويفضل من إعدادات الراوتر تخفي ظهور أسم الشبكة + تحدد عدد الأجهزة المتصلة وتغير كلمة السر بأرقام وحروف ورموز.
وممكن تعرف مين الأجهزة المتصلة معاك من الراوتر أو ببرامج معينة.

ملحوظة 2 : أنا عارف أن للأسف دي إجراءات قاسية، بس للأسف ده بسبب أننا فى أيام ما يعلم بيها غير ربنا، والأنترنت دلوقتي بقي عصب الحياة وبقي يعتمد عليه فى 90% من إحتياجات سيادتك من دراسة أكاديمية وكورسات و و و .... إلخ.
مش معقولة الواحد كل شوية يجدد الباقة !
هسيبلك سكرين بالجيجات الباقية قبل ميعاد تجديدي بيوم، لاحظ أنه عمره ما كمل الشهر كاااااامل عندي، ساعتها يا كنت بجدده يا كنت بسيبه وبكون متضايق.

ملحوظة 3 : لو حضرتك عاوز تتعاقد على خدمة أنترنت و فى فرع الشركة الموظف قالك لازم تاخد خط إجباري مع الراوتر = الموظف كذاب والخط مش أجباري هو مجرد عاوز يحقق التارجت بتاعه منهم لله، من حقك ترفض وتهدده أنك هتتصل بالجهاز القومي لتنظيم الإتصالات على رقم : 155
هتلاقي الموظف بقي زي الفل وهيديك الراوتر من غير الخط.

ملحوظة 4 : أوعي تعمل نفسك ناصح وتتصل بالشركة وتسألهم أخفض السرعة أزي، هو فيه حرااااامي هيفولك أنه حرااااااااامي ؟!
لحد هنا خلص جزء الأنترنت المنزلي.
....................................................................................
سرعة النت الذرية وخدعة طاجن الملوخية.
أيه هي الـ 2G والـ 3G والـ 4G
وعلاقة نصب شركات الإتصالات !
( 1 ) ال 2G بتستخدم تقنية ال 2.75 إللي كانت بتظهرلك حرف ( E ) إختصاراً ل EDGE ودي سرعته بسرعة السحلفة = 384 كيلو بت فى الثانية.
( 2 ) ال 3G والمعروف ب ( UMTS ) أنواع تقنياتها 3.5 و 3.75 الفرق بينهم حوالي من 2 ميجا بت ل 7 ميجا بت فى الثانية لو شغال على تقنية ال ( HSPS ) فى ال 3G وبيظهرلك الرمز ب ( +H )
( 3 ) ظهرت بعدها تقنية ال 3.9 ودي معروفة بإسم LTE ودي يا حبيبي إللي الشركات بتسوقلها على أساس قال أيه أنها 4G والكلام ده مش حقيقي لإن كل التقنيات ليها علاقة ب ال 3G ولكن بسرعات مختلفة.
الفرق بيكون فى خدمات نقل الصوت، الفيديو،الأنترنت،تحميل البيانات.
بسرعة تتراوح من 7 ميجا بت ل 56 ميجا بت وده طبعاً مش بيحصل بسبب إن شركات الإتصالات مش عاوزة تطور خدماتها علشان متصرفش فلوس.
( 4 ) سنة 2009 ظهرت تقنية ال 4G فى السويد تقريباً والمفرووووض إن سرعته أسرع 10 مرات تقريباً من ال 3G.
والإتحاد الدولي للإتصالات كان كلامه إن سرعته بتكون 100 ميجا بت فى الثانية للتحميل وده طبعاً يا حبيبي مش بيحصل.